Marglaga samræðurými í stafrænt vel búnum stærðfræðitímum

Description

Í erindinu er fjallað um hvernig samræðurými skapast í stafrænt vel búnum stærðfræðitímum á unglingastigi á Íslandi. Þrátt fyrir aukna notkun stafrænna verkfæra í skólastarfi hefur lítið verið rannsakað hvernig þau geta stutt við samræður til náms, sérstaklega í íslenskum skólum. Byggt er á þriggja ára langtímarannsókn þar sem greint var hvernig kennarar skapa samræðurými sem nemendur taka þátt í og hvernig samspil stafrænna verkfæra við samskipti, samvinnu og samvitund (e. interthinking) birtist í skólastofunni. Gögnin eru myndupptökur úr kennslustundum sem veita innsýn í hvernig nemendur og kennarar nýta stafræn verkfæri í sameiginlegri og einstaklingsbundinni vinnu. Frumniðurstöður sýna hvernig kennarar styðja við samræðu og samvinnu með spurningum, leiðsögn og fjölbreyttum aðferðum, á meðan nemendur vinna saman eða sjálfstætt í gagnvirku sambandi við tæknina. Einnig kemur fram hvernig tal, líkamstjáning, tækninotkun og skipulag kennslu vinna saman að því að skapa marglaga samræðurými í tímum. Með því að skoða sjónarhorn bæði kennara og nemenda gefa niðurstöðurnar heildstæða mynd af því hvernig samræður og tækni fléttast saman í stærðfræðikennslu. Niðurstöðurnar sýna að þegar stafræn tækni er nýtt í námi og kennslu geta bæði skapast tækifæri og áskoranir til að styðja við samræður og samvinnu. Þær benda einnig til að slík samræða geti aukið áhuga nemenda, stutt við virkni þeirra og dýpkað skilning á viðfangsefnum námsins.

Period	3 Oct 2025
Event title	Menntakvika 2025: Kennaramenntun í deilgunni. Hvar stöndum við?
Event type	Conference
Location	Reykjavík, IcelandShow on map
Degree of Recognition	National