„Þetta úrræði var svona uppáhalds hjá mér“: Ávinningur samstarfs félagsmiðstöðvar og barnaverndar

Með tilkomu löggjafar um samþættingu þjónustu í þágu farsældar barna árið 2021 hefur sífellt meiri áhersla verið lögð á samstarf þvert á fagstéttir og stofnanir tengdar menntun, frítíma og velferð. Í erindi þessu verður varpað ljósi á niðurstöður eigindlegrar rannsóknar á ávinningi samstarfs félagsmiðstöðvar og barnaverndar í sveitarfélaginu Árborg. Í erindinu verður varpað ljósi á viðhorf starfsfólks barnaverndar, velferðarþjónustu og félagsmiðstöðvar til samstarfsverkefnisins. Gagna var aflað með viðtölum sem voru þemagreind. Niðurstöðurnar verða settar í samhengi við skrif fræðimanna um gildi þverfaglegs samstarfs til að tryggja farsæld barna. Niðurstöðurnar gefa til kynna fjölþættan ávinning þverfaglegs samstarfs fyrir fagfólk í ólíkum stofnunum og jákvæð áhrif á félagslega virkni barna og unglinga sem samstarfinu tengjast. Rannsóknin er framlag til þekkingar á gildi samstarfs þvert á fagstéttir, byggt á nýlegu samstarfsverkefni tveggja ólíkra stofnana sem staðsettar eru í sveitarfélagi sem var tilnefnt eitt innleiðingarsveitarfélaga í tengslum við ný farsældarlög. Leiða má líkum að því að sú þekkingarsköpun sem á sér stað í þverfaglegu samstarfi muni skipta höfuðmáli til að markmið laganna nái fram að ganga. Rannsóknin dregur einnig fram hve mikilvæg stoð félagsmiðstöðvar eru fyrir farsæld barna og unglinga og hvers starfið er megnugt í samstarfi við lykilstofnanir samfélagsins, á borð við barnavernd.