Er tónlistarsmekkur kórsöngvara óháður menntunarstigi? Um tengsl menntunar og viðhorfa til tónlistar og verkefnavals í kórastarfi á Íslandi og í Englandi

Í þessari grein verður fjallað um hluta niðurstaðna úr tveimur tónlistarfélagsfræðilegum rannsóknum á kórastarfi. Þáttur menntunarstigs og tónlistarmenntunar verður sérstaklega skoðaður í þessum rannsóknum; þ.e. hvort menntun ráði miklu um tónlistarsmekk og viðhorf til verkefnavals kóra. Þessi atriði eru rædd í ljósi kenninga Pierre Bourdieu um „habitus“ og smekkvísi og gagnrýni Antoine Hennion á hefðbundna akademíska flokkunartilhneigingu á menningarsmekk og menningarneyslu. Einnig verður tekið mið af hugmyndum Robert Stebbins og John Drummond um markalínur milli áhugamanna og atvinnumanna í tónlist. Niðurstöður gefa vísbendingar í þá átt að menntunarstig og tónlistarmenntun hafi minni áhrif á tónlistarsmekk og verkefnaval kóra en áður var haldið. Varpað er fram þeirri spurningu hvort þátttaka í kórastarfi brjóti niður markalínur milli þjóðfélagsstöðu, menntunarstigs og tónlistarsmekks; að viðhorf til verkefnavals stýrist ekki af tónlistarmenntun heldur þeirri staðreynd að það að syngja í kór reynist vera einhvers konar „endurmenntun“ í mati á tónlist.