Fötlunarfræði : nýjar íslenskar rannsóknir

Í þessari bók er fötlunarfræði kynnt í fyrsta sinn sem fræðigrein á Íslandi. Bókin bætir úr brýnni þörf fyrir íslenskt lesefni á þessu nýja fræðasviði. Jafnframt er hér fyrsta ritsafn íslenskra rannsókna um daglegt líf fatlaðs fólks í íslenskum samtíma. Tíu íslenskir fræðimenn leggja til efni í bókina. Viðfangsefnin eru fjölbreytt og brugðið er upp myndum af ólíkum sviðum og aðstæðum fatlaðs fólks frá bernsku til fullorðinsára, fjölskyldum þeirra og kerfinu sem veitir því þjónustu. Bókin gefur innsýn í fjölbreyttan og flókinn veruleika sem til þessa hefur verið mörgum framandi og hulinn. Greinunum er það öllum sameiginlegt að leggja áherslu á rétt fatlaðs fólks til fullrar aðildar að lífi, starfi og leik með öðrum í samfélaginu. Bókin er tímamótaverk í fræðistarfi og rannsóknum í málefnum fatlaðra á Íslandi. (Heimild: Bókatíðindi)