Gullinsnið - þemahefti

Daglega verða fyrir okkur hlutir sem við þekkjum og flokkum saman þó að þeir séu ekki nákvæmlega eins. Hús eru með margs konar lagi, lítil og stór, og hlutföllin í þeim eru ólík. Sama má segja um margt annað sem auganu mætir, hver einstakur hlutur hefur sín sérkenni og sín hlutföll.

Í stærðfræðinni reynum við að greina hlutina niður í einfaldar einingar. Grunnmyndin í mörgum húsum er til dæmis oft rétthyrningur. Rétthyrningur er ferhyrningur þar sem öll horn eru rétt, 90° að stærð, en samt getur lögun rétthyrninganna verið ólík. Hlutfall, sem er nærri 8:5 þykir mörgum þægilegt fyrir augað, vera hvorki of langt né breitt. Hlutfallið nefnist gullinsnið og rétthyrningurinn gullinn rétthyrningur.