Hagnýtar aðferðir og hugtök í kennslu

Sívaxandi fjölgun nemenda sem ekki hafa íslensku að móðurmáli kallar á fagþekkingu kennara til að mæta námsþörfum þeirra. Núverandi staða kallar á endurskoðun skólastarfs sem í gegnum árin hefur tekið mið af tiltölulega einsleitum nemendahópi varðandi uppruna, menningu og tungumál. Margir þættir hafa áhrif á árangur fjöltyngdra nemenda í íslensku skólakerfi. Í því sambandi má helst nefna fagmennsku og fagþekkingu kennara, örugg og örvandi námsrými, traust samskipti og samstarf með foreldrum af erlendum uppruna og ekki síst kennsluaðferðir sem byggja á auðlindum nemenda. Nýleg dæmi sýna þó að sumir skólar hafa þróað viðeigandi starfshætti út frá tungumálum nemenda en þessi farsælu dæmi byggja þó að miklu leyti á einstökum lykilkennurum í skólunum – kennurum sem hafa þekkingu, áhuga og eldmóð til að takast á við nýjar áskoranir. Þessum kafla er ætlað að koma til móts við ákall kennara um leiðir og aðferðir sem nýtast við kennslu fjöltyngdra nemenda með áherslu á virkni þeirra í námi.  Fjallað er um kennsluaðferðir út frá hugmyndafræði fjölmenningarlegrar kennslu og námi fyrir alla með áherslu á að tryggja aðgang að námi, skapa námsrými og jöfn tækifæri til náms. Kynntar verða kennsluaðferðir sem byggja á auðlindum nemenda og styrkleikum , t.d. tungumálaforða þeirra, fyrri þekkingu, menntun og reynslu.