Hif, lykilumritunarþáttur í efnaskiptum og æðamyndun

Hif1 (hypoxia-inducible factor) er lykilumritunarþáttur í frumum sem bregst við breytingum á styrk súrefnis. Við lækkaðan súrefnisstyrk (hypoxia) eykst magn Hif1. Þannig stýrir Hif1 umritun á genum sem eru mikilvæg fyrir ákveðin efnaskipti og æðamyndun. Stjórnun á magni Hif1 er mikilvæg og niðurbrotsferlið gegnir þar veigamiklu hlutverki. Phd (prolyl hydroxylase) er ensím sem tekur þátt í stjórnun á Hif1. Við eðlilegan súrefnisstyrk (normoxia) tengir Phd hýdroxý-hóp á tvær prólín amínósýrur Hif1. Þetta virkjar próteinflóka sem leiðir til niðurbrots á Hif1 í ubiquitin-proteasome-ferlinu. Margt er óljóst með gerð og starfsemi próteinflókans. Á fyrirlestrinum verður m.a. gerð grein fyrir hlutverki Limd1 í stjórnunarferli Hif1, en nýlega var birt grein í Nature Cell Biology sem skýrir betur þetta ferli. Greinina má nálgast í heild sinni á heimasíðu Keldna.