Hversu sýnilegt er “Icelandic Agricultural Sciences” í alþjóðlegum vefsetrum?

Inngangur: Alþjóðlega vísindaritið Icelandic Agricultural Sciences (IAS; www.ias.is) birtir ritrýndar vísindagreinar á ensku um hagnýt náttúrufraeði, umhverfisfræði og nýtingu auðlinda. Útgáfustofnanir IAS eru: Hafrannsóknastofnun, Landbúnaðarháskóli Íslands, Landgræðslan, MATÍS, Ráðgjafamiðstöð Landbúnaðarins, Skógræktin og Tilraunastöð Háskóla Íslands í meinafræði að Keldum. Tímaritið er í opnum rafrænum aðgangi og er eitt af þremur íslenskum ISI vísindaritum. Greinar í IAS koma fram í ýmsum alþjóðlegum vefsetrum. Aðferð: Til að kanna hversu sýnilegt IAS er var framkvæmd leit í vefsetrum Clarivate Analytics og Scopus-Elsevier þann 8. október 2021. Alls voru 93 IAS greinar (2009-2021) í Clarivate Analytics gagnagrunni og 86 (2010-2020) í Scopus gagnagrunni. Vitnað hefur verið í þessar 93 og 86 greinar 547 og 475 sinnum, að meðaltali 5,9 og 5,5 tilvitnanir í hverja grein. Gröfin sýna dreifingu tilvitnana m.t.t. ára. Clarivate Analytics vefsetrið flokkar greinarnar sem vitna í IAS í 57 fræðasvið og Scopus vefsetrið í 24 fræðasvið. Clarivate Analytics gögnin sem sýnd eru hér takmarkast við 25 helstu sviðin. Höfundar að greinunum 93 í IAS eru frá 90 stofnunum og háskólum víðs vegar í heiminum, í fimm heimsálfum og 24 löndum. Gögnin sem sýnd eru hér greina frá 20 helstu stofnunum og öllum löndunum í Clarivate Analytics gagnagrunni. Ályktanir: Vefsetursgreiningin á IAS endurspeglar árangursríkt gæðastarf tímaritsins, fjölbreytt fræðasvið hagnýtra náttúrufræða og gefandi alþjóðlegt samstarf. Árangur útgáfustarfsins er góður og IAS er vel sýnilegt meðal vísindarita sem það er sett í flokk með.