Icelandic Agricultural Sciences (IAS), viðurkennt ISI-vísindarit

Íslensk náttúra á margt sameiginlegt með náttúru annarra landa en er einnig einstök um margt. Það er því mikilsvert fyrir íslenska vísindamenn að koma sínum rannsóknarniðurstöðum á framfæri á erlendum vettvangi og þá helst í viðurkenndum fræðilegum miðlum, en um leið þar sem mestar líkur eru á því að alþjóðasamfélagið finni íslenskar rannsóknaniðurstöður. Icelandic Agricultural Sciences (IAS) er alþjóðlegt ISI-vísindarit sem býður íslenskum og erlendum fræðimönnum á sviði lífvísinda, umhverfisfræða- og annarra náttúrufræða upp á slíkan vettvang. Í ISI-gagnagrunninum má finna ýmsar tölulegar upplýsingar um tímarit, greinar rannsóknarstofnanir og vísindamenn, þ.m.t. upplýsingar um fjölda tilvitnana í birtar greinar og hverjir vitna í þær. ISI-vefsetrið býður upp á ýmsa möguleika við tölulega úrvinnslu á gögnum. IAS-tímaritið er gefið út af átta íslenskum stofnunum sem beint eða óbeint tengjast nýtingu á náttúruauðlindum. Allar greinar sem birtast í ritinu eru nú ritrýndar af að minnsta kosti tveimur fagmönnum, þar af einum erlendum. Ritið styrkir íslenska menningu og vísindastarf með því að gera fræðasvið okkar sýnileg á einum stað í frumskógi alþjóðlegra vísindarita. Þetta eykur líkur á því að erlendir og innlendir samstarfsmenn okkar finni þær þegar þeir leita sérstaklega að íslenskum rannsóknarniðurstöðum. Einnig má geta þess að birting í ritinu er nú metin til 15 stiga í starfsmati opinberra háskóla og pdf-afrit af öllum birtum vísindagreinum í ritinu eru aðgengileg á GoogleScholar-leitarvélinni að kostaðarlausu. Ritið kemur út einu sinni á ári eða oftar, háð efnismagni sem berst og samþykki skv. gæðaferli IAS-tímaritsins. Í síðasta hefti IAS, 24. hefti ársins 2011 voru sjö greinar eftir fjórtán höfunda, þar af einn erlendan. Á veggspjaldinu verða m.a. úttektir á fagsviðum greina sem birst hafa í ritinu og yfirlit yfir þær stofnanir sem greinahöfundar vinna á. Allar nánari upplýsingar um útgáfu í IAS má finna á heimasíðu ritsins: www.ias.is. Þar má m.a. finna leiðbeiningar um birtingar í ritinu, rýniferil og leiðréttingar og nálgast rafræn afrit af öllum vísindagreinum sem birst hafa í ritinu frá árinu 1988.