Leit að æxlisbæligeni með samanburði á tjáðum genum í krabbameinsfrumum með mismunandi arfgerð og vaxtarhraða

Tíðar úrfellingar á litningasvæði 3p í mörgum krabbameinsgerðum benda til að æxlisbæligen sé á svæðinu. Einnig hefur verið sýnt fram á æxlisbælivirkni litnings 3 í tilraunadýrum með samanburði á æxlisvexti fruma með og án viðkomandi litningasvæðis. Við höfum rannsakað mismunandi arfgerðir nýrnakrabbameinsfruma og illkynja bandvefsfruma m.t.t. 3p erfðamarka og vaxtar í ónæmisbældum músum. Litningur 3 hefur verið settur inn með frumusamruna (microcell hybrid lines). Í báðum frumulínum er æxlisvöxturinn hraðari í ónæmisbældum músum ef litningur 3 er ekki til staðar. Ennfremur eykst æxlisvöxtur samhliða tapi á 3p erfðamörkum (elimination test). Samanburður á tjáningu gena sömu frumulína, með og án þriðja litnings, hefur verið gerður með RT-DD tækni (differential display). Víxlumritunarhvarf á RNA var framkvæmt með notkun 16 mismunandi lykla. 240 mismunandi PCR hvörf voru gerð og nokkur hundruð gen magnast upp í hverju hvarfi. Með þessarri samsetningu af lyklum var hægt að magna stóran hluta af tjáðum genum Afurðir PCR hvarfsins voru aðgreindar í raðgreiningargeli. Þau gen sem komu fram í frumum með litning 3 og hægfara æxlisvöxt voru einangruð úr gelinu, endurmögnuð í PCR og notuð sem þreifarar. Northern blettunar tækni gaf til kynna hvort munur er á tjáningu viðkomandi gena. Þar sem munur á tjáningu kom fram við Northern blettun var framkvæmd Southern blettun (á bandvefsfrumulínur úr músum með og án þriðja litnings úr mönnum) með sama þreifara til að staðsetja viðkomandi gen.