Lestrarkennsla með PALS aðferðinni og virk þátttaka nemenda í lestrarnámi

Í þessu erindi verður fjallað um kennsluaðferðir sem rannsóknir hafa sýnt að auki virka
þátttöku nemenda í skólastarfi (e. student engagement*). Umfjöllunin byggir á ritstýrðri
fræðibók sem kom út árið 2020 hjá Springer forlaginu og heitir „Student Engagement
Effective Academic, Behavioral, Cognitive, and Affective Interventions at School“.
Umfjölluninni verður skipt eftir kennsluaðferðum sem styðja við virkni í námi (e. academic
engagement), hegðunarlega virkni (e. behavioral engagement), tilfinningalega virkni (e.
affective engagement) og vitsmunalega virkni (e. cognitive engagement). Sérstaklega
verður fjallað um rannsóknarniðurstöður sem beinast að lestrarkennslu með PALS (e. Peer
Assisted Learning Strategy) aðferðinni sem notuð er í fjölda skóla á Íslandi (sjá
https://www.sislvefur.is/). Erlendar rannsóknir á virkni PALS aðferðarinnar benda til að virk
þátttaka í lestrarnámi aukist með notkun PALS. Aukin virkni í námi er einn þeirra
grundvallarþátta sem ýtir undir innri lestraráhughvöt og er jafnframt verndandi þáttur fyrir
brottfalli úr námi á seinni stigum. Samanburður á notkun PALS aðferðarinnar og
hefðbundinnar lestrarkennslu bendir til aukinnar lestrarhæfni allra nemenda með notkun
PALS. Þörfin fyrir að upplifa hæfni í lestri er jafnframt ein þeirra grundvallarþarfa sem
nauðsynlegt er að uppfylla til að styðja við virka þátttöku nemenda í lestrarnámi. Í erindinu
verður fjallað um almenna uppbyggingu PALS aðferðarinnar við lestrarkennslu m.t.t. virkar
þátttöku nemenda í lestrarnámi og þá sérstaklega rýnt í fyrirliggjandi rannsóknir á notkun
hópaskiptingar, einstaklingsmiðunar og leikja í skólastofunni.