„Nú fór ég að heyra eitthvað jákvætt á hverjum degi“ : áhrif einstaklingsmiðaðra stuðningsáætlana í leikskóla og upplifun leikskólastarfsmanna og foreldra af vinnubrögðunum

Hér verður lýst áhrifum einstaklingsmiðaðra stuðningsáætlana á virka þátttöku fimm leikskólabarna sem áttu í langvarandi hegðunarerfiðleikum. Stuðningsáætlanirnar voru byggðar á virknimati og fólu í sér aðferðir sem beindust að bakgrunnsáhrifavöldum, aðdraganda og afleiðingum hegðunar með áherslu á hvatningu og stuðning við jákvæða hegðun. Stór þáttur stuðningsáætlana var hvatningarkerfi með stighækkandi viðmiðum um frammistöðu sem sett var upp með hliðsjón af áhugasviði þátttakenda. Tvær til þrjár útgáfur hvatningarkerfa voru settar upp fyrir hvern þátttakanda og inngrip varði í fjórar til tólf vikur. Þátttakendur voru fimm drengir á aldrinum þriggja til sex ára, í leikskólum á höfuðborgarsvæðinu, sem höfðu sögu um hegðunarvanda í eitt ár eða lengur. Tveir drengjanna voru með málþroskafrávik og annar þeirra með frumgreiningu um ADHD og röskun á einhverfurófi. Til rannsóknar var einnig upplifun leikskólastarfsmanna og foreldra af vinnu með virknimat og einstaklingsmiðaða stuðningsáætlun í leikskólaumhverfinu. Hálfopin viðtöl voru tekin við fjóra leikskólastarfsmenn og tvær mæður þeirra drengja sem tóku þátt í rannsókninni um upplifun þeirra af vinnubrögðunum. Auk þess svöruðu leikskólastarfsmenn spurningalista um einstaklingsmiðuðu stuðningsáætlanirnar. Endurteknar mælingar innan einliðasniðs með margföldum grunnskeiðum milli þátttakenda sýndu að virk þátttaka drengjanna jókst við íhlutun, að meðaltali úr 33,7% á grunnskeiði í 92,9% á inngripsskeiði og reyndist 94% eftir að notkun hvatningarkerfis var hætt. Áhrifastærðir reyndust frá d=3,12 til 11,03 sem endurspegla mjög sterk áhrif íhlutunar. Leikskólastarfsmenn töldu einstaklingsmiðaðar stuðningsáætlanir almennt falla vel að vinnu í leikskólanum, hæfilega umfangsmiklar og árangursríkar...