Postulínsskelkrónur – Fyrsti hluti

Postulínsskelkrónur (e. porcelain laminate veneers) hefur verið afar vinsæll meðferðarmöguleiki vestanhafs síðan snemma á níunda áratug síðustu aldar. Kostir meðferðarinnar eru að tiltölulega lítið inngrip þarf samanborið við krónugerð og sjúklingar almennt sáttir við útkomuna. Einnig jafnast ending skelkróna þegar rétt er farið að á við það allra besta sem gerist í krónumeðferð. Þrátt fyrir þetta hefur ekki mikið farið fyrir gerð skelkróna hérlendis og hafa þær ekki fengið ýkja mikið umtal. Í þessari grein er farið yfir sögu, kosti, galla, efnisval og klíníska endingu þessarar meðferðar. Annar hluti þessarar greinar, sem kemur út síðar, mun fjalla um klíníska verkferla skelkrónugerðar, vandamál sem upp geta komið og hvernig best sé að takast á við þau.