Tilraunastöð Háskóla Íslands í meinafræði að Keldum. Árbók Háskóla Íslands 2001, pp. 158-159

Helstu rannsóknasviðin voru sem fyrr ónæmis- og sjúkdómafræði fiska, hæggengir smitsjúkdómar, þ.e. visna, riða og skyldir sjúkdómar, sníkjudýra- og sýklafræði og líftækni, þ.e. þróun bóluefna. Allmargir áfangar náðust sem kynntir voru á fjölmörgum ráðstefnum hérlendis og erlendis. Í alþjóðlegum ritrýndum tímaritum birtust niðurstöður rannsókna á meinvirkum efnum fisksýkla, m.a. í músalíkönum, alkaline phosphatasa frá kuldakærri bakteríu, ónæmiskerfi lúðu og þorsks, gamaveiki, æxlisvexti og hitakærum bakteríum, auk yfirlitsgreinar um lyf gegn sníkjudýrum. Áfram var unnið að alþjóðlegum samvinnuverkefnum sem styrkt eru af Evrópusambandinu, þ.e. á príonsjúkdómum: riðu í sauðfé og Creutzfeldt-Jakob sjúkdómi auk þróunar bóluefnis gegn alnæmi þar sem apaveiran (SIV) í rhesusöpum er notuð sem líkan. Einnig fékkst nýr styrkur frá ESB vegna samanburðarannsókna á þróun ónæmiskerfis nokkurra fisktegunda (FISHAID verkefni). Sérfræðingar sem fást við visnu- og sníkjudýrarannsóknir héldu áfram þátttöku í COST-áætlun á vegum ESB. Ennfremur styrkti Agricultural Research Service í Bandaríkjunum rannsóknir á faraldsfræði Campylobacter, m.a. notkun á sameindalíffræðilegum aðferðum til greininga. Þátttaka í samnorrænum verkefnum vegna rannsókna á sýklalyfjaónæmi og þróun aðferða við prófanir fyrir garnaveikismiti var styrkt af Nordisk Kontaktorgan for Jordbrugsforskning. Auk formlegra samvinnuverkefna eiga velflestir sérfræðingar stofnunarinnar samstarf við erlenda vísindamenn. Sem fyrr voru stundaðar þjónusturannsóknir vegna fisksjúkdóma, í bakteríufræði, sníkjudýrafræði, líffærameinafræði og blóðmeinafræði, auk leitar að sýklalyfjaleifum. Tilraunastöðin framleiddi m.a. bóluefni gegn lambablóðsótt, bráðapest, garnapest, lungnapest og garnaveiki, svo og mótefnablóðvökva gegn lambablóðsótt og garnapest. Einnig var safnað blóði úr hrossum, kindum og marsvínum til notkunar á rannsóknastofum og í sýklaæti. Smádýr voru ræktuð til notkunar við tilraunir, bæði fyrir Tilraunastöðina og aðrar rannsóknastofnanir. Unnið er að ítarlegri ársskýrslu og er útgáfa hennar væntanleg í apríl 2002.