Tilraunastöð Háskóla Íslands í meinafræði að Keldum. Árbók Háskóla Íslands 2011, pp. 408-410

Tilraunastöðin er metnaðarfull háskólastofnun með margþætta starfsemi og starfar hún fyrst og fremst sem rannsóknastofa. Helstu verkefni stöðvarinnar eru rannsóknir á dýrasjúkdómum í þeim tilgangi að efla skilning á eðli sjúkdóma og skapa nýja þekkingu. Hvatinn að hagnýtingu rannsóknanna er hversu mikilvægt er að dýr séu heilbrigð og beri ekki sjúkdóma í menn. Heilbrigð dýr eru auk þess forsenda fyrir arðbærum landbúnaði og fiskeldi. Mikilvægt er að stofnunin geti brugðist sem skjótast við nýjum og aðkallandi vandamálum á sviði sjúkdómagreininga. Tilraunastöðin hefur skapað sér sérstöðu með framúrskarandi rannsóknum m.a. vegna mannauðs og sérstakrar sjúkdómastöðu á Íslandi, sem tiltölulega auðvelt er að halda skráningu yfir. Vegna einangrunar landsins eru hér vel skilgreindir dýrastofnar sem hafa annað næmi fyrir ýmsum sjúkdómum en gengur og gerist í heiminum. Rannsóknir á slíkum efnivið hafa gefið tilraunastöðinni sérstöðu. Helstu rannsóknasviðin voru ónæmis- og sjúkdómafræði fiska, veiru- og bakteríusýkingar í sauðfé og hestum, sumarexem í hestum, riða og skyldir sjúkdómar og sníkjudýrafræði. Auk hefðbundinna starfsmanna unnu nokkrir nemendur að rannsóknaverkefnum á fræðasviðum stöðvarinnar. Vegna rannsóknarumhverfisins á Keldum er tiltölulega hentugt að skilgreina ramma um rannsóknarnám á ýmsum stigum, allt upp í doktorsnám. Samt sem áður fækkaði nemendum á árinu. Allmargir áfangar náðust og voru þeir kynntir á fjölmörgum ráðstefnum hérlendis og erlendis. Í alþjóðlegum ritrýndum tímaritum birtust m.a. niðurstöður rannsókna í bakteríu-, sníkjudýra- og ónæmisfræðum. Þar af voru birtar nítján greinar í ISI-tímaritum, sem er nálægt eða rétt undir meðaltali á undanförnum árum. Víðtækt samstarf er við erlendar alþjóðlegar stofnanir og háskóla. Innanlands hefur tilraunastöðin samstarf við stofnanir og háskóla um ákveðin verkefni og aðstaða og tæki eru samnýtt. Einnig er starfað með stjórnsýslustofnunum innanlands, s.s. Matvælastofnun. Samhliða þessu er samstarf stöðvarinnar við atvinnulífið fjölbreytt og gefandi. Má þar nefna landbúnað, fiskeldi og matvælaframleiðslu. Tilraunastöðin hefur þjónustuskyldur varðandi greiningar á dýrasjúkdómum en þær eru gerðar í nánum tengslum við rannsóknirnar til að samlegðaráhrif verði sem mest. Sértekjur fengust vegna útseldrar sérfræðivinnu, einkum við sjúkdómagreiningar. Tilraunastöðin framleiddi bóluefni og mótefnablóðvökva gegn bakteríusjúkdómum í sauðfé. Einnig var blóði úr hrossum, kindum og naggrísum safnað til notkunar á rannsóknastofum. Smádýr voru notuð við tilraunir, bæði tilraunir við Tilraunastöðina og aðrar rannsóknastofnanir.