Tilraunastöð Háskóla Íslands í meinafræði að Keldum - Ársskýrsla 2009

Tilraunastöð Háskóla Íslands í meinafræði að Keldum er metnaðarfull háskólastofnun þar sem fram fer margþætt starfsemi. Á Keldum starfa öflugir, sérmenntaðir og framsæknir vísindamenn með faglega forystu á ýmsum fræðasviðum og þar að baki býr mikil þekking og reynsla. Jafnframt er fjölbreytt og gefandi samstarf við atvinnulífið, s.s. við landbúnað, fiskeldi og matvælaframleiðslu. Meginviðfangsefni Tilraunastöðvarinnar eru rannsóknir á dýrasjúkdómum og varnir gegn þeim. Hvatinn að hagnýtingu rannsóknanna er mikilvægi heilbrigðra dýra sem fá fóður af bestu gæðum og bera ekki sjúkdóma í menn. Vegna einangrunar landsins er staða dýrasjúkdóma sérstök og tiltölulega auðvelt er að halda skráningu yfir þá. Á Íslandi eru vel skilgreindir dýrastofnar sem hafa annað næmi fyrir ýmsum sjúkdómum en gengur og gerist í heiminum. Rannsóknir á slíkum efnivið, sem byggir á ríkri hefð og sterkri sögu, hefur gefið Tilraunastöðinni sérstöðu. Mikilvægt er að varðveita og efla nútímalega þekkingarstofnun eins og Tilraunastöðina, sem á framtíð fyrir sér og er í sterkum tengslum við þarfir atvinnulífsins. Hröð og kraftmikil uppbygging á Keldum er enn mikilvægari nú vegna þeirra kringumstæðna sem eru í íslensku þjóðlífi þessa dagana. Það þarf að skapa aðstæður til frekari framþróunar. Þjálfun starfsmanna, rannsóknir og nýsköpun á fræðasviðum Tilraunastöðvarinnar, sem þegar hefur trausta innviði, er eitt af þeim langtímaúrræðum sem hlúa þarf betur að. Hins vegar er ljóst að erfiðleikar eru framundan vegna niðurskurðar á fjárlögum. Tilraunastöðin tengist læknadeild HÍ og hefur sérstaka stjórn og sjálfstæðan fjárhag. Sigurður Guðmundsson, forseti Heilbrigðisvísindasviðs HÍ tók við stjórnarformennsku Tilraunastöðvarinnar af prófessor Stefáni B. Sigurðssyni. Starfseminni er skipt í þrjár fagdeildir; 1) Veiru- og sameindalíffræðideild, 2) Bakteríu- og sníkjudýradeild og 3) Rannsóknadeild fisksjúkdóma. Árni Kristmundsson tók við deildarstjórastarfinu af Sigurði Helgasyni á Rannsóknadeild fisksjúkdóma. Sigurði Helgasyni eru þökkuð vel unnin störf sem deildarstjóri síðastliðna áratugi eða frá upphafi starfseminnar, en deildin hefur haft lagastoð frá árinu 1986.