Tilraunastöð Háskóla Íslands í meinafræði að Keldum

Meginviðfangsefni Tilraunastöðvarinnar er rannsóknir á dýrasjúkdómum og varnir gegn þeim. Tilraunastöðin hefur skapað sér sérstöðu með framúrskarandi rannsóknum, m.a. vegna mannauðs og sérstakrar sjúkdómastöðu á Íslandi sem tiltölulega auðvelt er að halda skráningu yfir. Vegna einangrunar landsins eru hér vel skilgreindir dýrastofnar sem hafa annað næmi fyrir ýmsum sjúkdómum en gengur og gerist. Rannsóknir á slíkum efnivið hafa gefið Tilraunastöðinni sérstöðu. Helstu rannsóknasviðin voru ónæmis- og sjúkdómafræði fiska, hæggengir smitsjúkdómar, þ.e. mæði-visna, riða og skyldir sjúkdómar, sumarexem í hestum og sníkjudýra- og sýklafræði. Allmargir áfangar náðust sem kynntir voru á fjölmörgum ráðstefnum hérlendis og erlendis. Í alþjóðlegum, ritrýndum tímaritum birtust niðurstöður rannsókna í príon-, veiru-, bakteríu-, sníkjudýra- og ónæmisfræðum. Flestir sérfræðingar stofnunarinnar eiga samstarf við innlenda og erlenda vísindamenn. Birkir Þór Bragason lauk Ph.D.-prófi og titill doktorsritgerðar hans er „An analysis of PrRC protein interactions and of the effect of an ovine R151C polymorphism on PrRC processing." Tilraunastöðin hefur þjónustuskyldur varðandi greiningar á dýrasjúkdómum sem eru í nánum tengslum við rannsóknirnar til að samlegðaráhrif verði sem best. Faggilding á prófunaraðferðum og vottun á gæðakerfi fékkst samkvæmt alþjóðlega faggildingarstaðlinum ÍST ISO/IEC 17025. Sértekjur fengust vegna útseldrar sérfræðivinnu, einkum vegna sjúkdómagreininga. Vegna ákvörðunar Landbúnaðarstofnunar að starfrækja ekki rannsóknastofu sem var áður á Keldum á vegum Embættis yfirdýralæknis, þá tók Tilraunastöðin við ákveðnum verkefnum við sjúkdómagreiningar. Tilraunastöðin framleiddi bóluefni og mótefnablóðvökva gegn bakteríusjúkdómum í sauðfé. Einnig var safnað blóði úr hrossum, kindum og naggrísum til notkunar á rannsóknastofum. Smádýr voru notuð við tilraunir, bæði fyrir Tilraunastöðina og aðrar rannsóknastofnanir.