Vefsetursgreining á „Icelandic Agricultural Sciences“

Alþjóðlega vísindaritið Icelandic Agricultural Sciences (IAS; www.ias.is) birtir ritrýndar vísindagreinar á ensku um hagnýt náttúrufræði, umhverfisfræði og nýtingu auðlinda. Tímaritið er í opnum rafrænum aðgangi og er eitt af þremur íslenskum ISI vísindaritum. Greinar í IAS koma fram í ýmsum alþjóðlegum vefsetrum. Leit var framkvæmd í vefsetrum Web of Science og Scopus þann 7. október 2019 til að kanna hversu sýnilegt IAS er. Alls voru 76 IAS greinar (2009-2018) í Clarivate Analytics gagnagrunni og 66 (2010-2018) í Scopus gagnagrunni. Vitnað hefur verið í þessar 76 og 66 greinar 369 og 314 sinnum, að meðaltali 4,9 og 4,8 tilvitnanir í hverja grein. Matsstuðlar eru nú 1,00 (Impact Factor) og 0,75 (Cite Score). SJR (SCImago Journal Rank) er 0,242 og SNIP (Source Normalized Impact per Paper) er 0,911. Hirsch-index mælist 10. Sú grein sem oftast var vitnað í fjallar um öskufall og áfok. Web of Science vefsetrið flokkar greinarnar sem vitna í IAS í 67 fræðasvið og Scopus vefsetrið í 22 fræðasvið. Höfundar að greinunum sem vitna í IAS eru frá 498 stofnunum og háskólum víðs vegar í heiminum, í sex heimsálfum og 56 löndum. Vefsetursgreiningin á IAS endurspeglar árangursríkt gæðastarf tímaritsins, fjölbreytt fræðasvið hagnýtra náttúrufræða og gefandi alþjóðlegt samstarf. Árangur útgáfustarfsins er góður og IAS er vel sýnilegt meðal vísindarita sem það er sett í flokk með.