Þróun námsorðaforðaprófs

Lýsing

Rannsóknir á orðaforða hafa leitt í ljós að efla þurfi skilning nemenda á námsorðaforða, en honum tilheyra orð sem notuð eru þvert á námsgreinar og skólastig. Umfangsmiklar rannsóknir sýna að nemendur á mismunandi aldri þurfa að þekkja þessi orð til að geta skilið, rætt og skrifað um það sem þau fást við í námi sínu í ólíkum námsgreinum. Tilgangur þessarar rannsóknar var að þróa orðaforðapróf fyrir nemendur í 7.–10. bekk grunnskóla sem snýst um námsorðaforða. Orðin koma af Lista yfir íslenskan námsorðaforða (LÍNO-2) sem sýnir röðun orða eftir tíðni þeirra í málheildinni MÍNO, en hún inniheldur samtímatexta, þar með talið námsefni grunnskólanema. Prófið var þróað í fjórum áföngum á árunum 2023–2025 með þátttöku samtals um 4.000 nemenda. Kynntar verða niðurstöður hvers áfanga með upplýsingum um þátttakendur, próffræðilega eiginleika og réttmæti. Einnig verður gerð grein fyrir niðurstöðum í fjórðu fyrirlögn eftir árgöngum, kyni og lengd búsetu í landinu og uppruna foreldra, þ.e. hvort báðir foreldrar, annað foreldri eða hvorugt talaði íslensku í æsku. Rætt verður hvernig megi nota slíkt próf sem matstæki í höndum kennara til að sjá skilning nemenda á tíðniröðuðum orðum, en líka hvernig megi nýta slíkt próf til að kanna framfarir í námsorðaforða yfir tiltekið tímabil.

Tímabil	3 okt. 2025
Viðburðartitill	Menntakvika 2025: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent