Atferlismiðuð hreinlætisþjálfun fyrir grunnskólabörn með einhverfu og þroskahömlun

Lýsing

Markmið rannsóknarinnar var að meta áhrif atferlismiðaðrar hreinlætisþjálfunar á klósettfærni 8 ára drengs og 11 ára stúlku, með einhverfu og þroskahömlun sem notuðu enn bleiu.

Efniviður og aðferðir: Framkvæmd rannsóknar skiptist í forsögu, undirbúning, grunnskeið, atferlismiðaða hreinlætisþjálfun og eftirfylgd. Gögnum var safnað með beinum athugunum, viðtölum og matslistum. Samsett margfalt grunnskeiðssnið yfir þátttakendur var notað til að meta atferlismiðaða hreinlætisþjálfun, þar sem stuðst var við verklag sem byggir á aðferðum LeBlanc o.fl. (2005). Verklagið fyrir hreinlætisþjálfunina fól í sér notkun nærbuxna en ekki bleiu, aukna vökvainntöku, tímaáætlun fyrir æfingar á notkun salernis og jákvæða styrkingu á viðeigandi notkun salernis. Verklagið fyrir þjálfun á frumkvæði fól í sér reglulega athugun á nærbuxum og þjálfun á frumkvæði að notkun salernis. Íhlutunin fór fram í þremur skrefum þar sem skiptust á æfingalotur á salerni og frjáls tími þar sem fengist var við einföld verkefni innan og síðar utan snyrtingar. Íhlutunin tók fimm daga og fór fram í skóla þátttakenda og á heimili þeirra.Niðurstöður: Klósettfærni stúlkunnar jókst um 98% til að losa þvag í salerni, um 100% til að hafa hægðir í salerni og um 41% til að sýna frumkvæði að notkun salernis. Klósettfærni drengsins jókst um 97% til að losa þvag í salerni, um 70% til að hafa hægðir í salerni og um 31% til að sýna frumkvæði að notkun salernis.

Ályktun: Niðurstöður benda til þess að atferlismiðuð hreinlætisþjálfun sem er framkvæmd í skólaumhverfi geti aukið klósettfærni einstaklinga með einhverfu og þroskahömlun

Tímabil	3 okt. 2025
Viðburðartitill	Menntakvika 2025: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent