Áskoranir og tækifæri með notkun gervigreindar í háskólastarfi: Raddir kennara og hlutverk háskóla. Frumrannsókn á viðhorfi og reynslu kennara við HÍ.

Lýsing

Gervigreind hefur á síðustu árum orðið æ fyrirferðameiri í háskólastarfi og hefur áhrif á alla þætti kennslu. Til að móta viðeigandi stefnu og stuðning innan háskólasamfélagsins er mikilvægt að skilja afstöðu kennara og upplifun þeirra af gervigreind. Þessi frumrannsókn kannar viðhorf og reynslu kennara við Háskóla Íslands af gervigreind í kennslu, mati þeirra á notkun nemenda á gervigreind og hugmyndir um hvernig háskólar geti best stutt við þá í breyttu fræðsluumhverfi.

Spurningakönnun, með 34 spurningum, var send til 2.007 háskólakennara, þar á meðal stundakennara, í gegnum SurveyMonkey. Í júlí 2025 höfðu 280 kennarar tekið þátt. Frumniðurstöður bentu til að flestir kennarar væru jákvæðir gagnvart gervigreind og telji hana nýtilega í kennslu. Algengast var að kennarar notuðu gervigreind til hugmyndavinnu og skipulags námskeiða en sjaldnar til að hanna námskeið, búa til kennsluefni, semja próf eða meta verkefni. Nokkrir nýttu gervigreind einnig við prófarkalestur, þýðingar, gagnagreiningar og forritun.

Áhyggjur komu þó einnig fram, meðal annars varðandi öryggi gagna og vegna siðferðilegra álitamála. Auk þess höfðu margir takmarkað traust á gæðum gervigreindarefnis. Margir kennarar sögðust hafa litla þekkingu á gervigreind og kölluðu eftir fræðslu, skýrari stefnu og aðgengi að völdum gervigreindartólum og stuðningi. Rannsóknin undirstrikar að háskólar þurfa að hlusta á raddir kennara til að bregðast markvisst við þessari þróun.

Tímabil	3 okt. 2025
Viðburðartitill	Menntakvika 2025: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent