Upplifun fjarnema á námsbraut í opinberri stjórnsýslu við Háskóla Íslands: Sveigjanleiki, gæði og umbótatækifæri

Lýsing

Á síðustu árum hefur fjarnám orðið meginkennsluform á námsbraut í opinberri stjórnsýslu við Háskóla Íslands. Markmið rannsóknarinnar var að kanna hvernig nemendur upplifa þetta námsfyrirkomulag og hvaða þættir í skipulagi náms og kennslu hafa mest áhrif á upplifun þeirra. Rannsóknarspurningin var: Hvernig er upplifun nemenda af fjarnámsbrautinni í opinberri stjórnsýslu og hvaða þættir í skipulagi náms og kennslu móta þá upplifun, með það að markmiði að hámarka gæði námsins og mæta þörfum fjarnemenda?

Byggt var á megindlegum og eigindlegum gögnum. Netkönnun var send til allra nemenda sem tóku 18 námskeið á brautinni á árunum 2022–2024. Alls tóku 237 nemendur þátt, þar af 200 sem voru skráðir á námsbrautina í opinberri stjórnsýslu. Svör voru greind með lýsandi tölfræði og þemagreiningu á opnum svörum.
Helstu niðurstöður sýna að sveigjanleiki er lykilþáttur jákvæðrar upplifunar. Nemendur eru mjög ánægðir með að geta stundað námið alfarið í fjarnámi (meðaleinkunn 5,9 af 6,0) og 70% kusu 100% fjarnám án staðmætinga.

Upptökur, sérstaklega fyrirfram teknir fyrirlestrar með góðu hljóði, eru metnar sem árangursríkasta kennsluaðferðin, á meðan rauntímafyrirlestrar án upptöku henta verst. Einstaklingsverkefni og heimapróf eru vinsælustu námsmatsleiðirnar en hefðbundnum staðprófum er alfarið hafnað. Netfundir eru þó mikilvægir sem félagslegur tengipunktur, að því gefnu að þeir séu val en ekki skylda.

Rannsóknin dregur fram skýra mynd af því að fjarnemar sækjast ekki eftir eftirlíkingu staðnáms, heldur eftir námsfyrirkomulagi sem byggir á sveigjanleika, aðgengi og faglegri leiðsögn. Niðurstöðurnar veita mikilvægan grundvöll til að móta stefnu og umbætur í fjarnámi á háskólastigi.
 

Tímabil	31 okt. 2025
Viðburðartitill	Þjóðarspegillinn 2025: Félagsvísindasvið Háskóla Íslands
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent