Niðurstöður úr rannsókn á notkun kennara við HÍ á gervigreind, viðhorfi þeirra til gervigreindar og þörf á fræðslu og stuðningi.

Lýsing

Gervigreind er að umbreyta háskólastarfi og kennslu á efri menntunarstigum. Í þessari rannsókn var kannað hvernig kennarar við Háskóla Íslands nýta gervigreind, hvert viðhorf þeirra er til notkunarinnar og hvaða stuðning þeir telja nauðsynlegan. Byggt var á netkönnun sem send var til allra kennara við HÍ sumarið 2025. Alls bárust 339 nothæf svör (17% svörun; 33% meðal akademískra starfsmanna). Spurningalistinn innihélt 79 Likert-fullyrðingar og sex opnar spurningar. Megindleg gögn voru greind með lýsandi tölfræði, þáttagreiningu og Mann-Whitney U prófi, en opin svör voru þemagreind.

Niðurstöður sýna að kennarar eru almennt jákvæðir gagnvart gervigreind og sjá tækifæri til að nýta hana í undirbúningi kennslu, hugmyndavinnu, gerð verkefna og prófspurninga. Innleiðing í daglegri kennslu er þó enn takmörkuð. Helstu áhyggjur snúa að siðferðilegum álitaefnum, gæðum og áreiðanleika efnis, gagnrýninni hugsun, persónuvernd og akademískum heilindum. Marktækur munur kom fram á milli Heilbrigðisvísindasviðs og annarra fræðasviða hvað varðar áskoranir og viðhorf til notkunar.

Kennarar kalla eftir skýrri stefnu og leiðbeiningum, hagnýtri og fagmiðaðri þjálfun, betra aðgengi að verkfærum og auknum tæknilegum og kennslufræðilegum stuðningi. Niðurstöðurnar undirstrika mikilvægi þess að hlusta á raddir kennara og móta heildstæða stefnu sem styður ábyrga og gagnreynda innleiðingu gervigreindar í kennslu.

Tímabil	11 des. 2025
Viðburðartitill	Kennsluþróunardagur Heilbrigðisvísindasviðs
Tegund atburðar	Annað
Staðsetning	Reykjavík, ÍslandSýna á korti
Viðurkenning	Innlent