Lýsing
Á árunum 2019–2025 náði hátt hlutfall nemenda í 1. bekk ekki væntum viðmiðum um fjölda rétt lesinna orða á mínútu. Þá hafa íslensk ungmenni fengið sífellt lægra skor á lesskilningsprófum PISA frá árinu 2009, en lesfimi er ein af nauðsynlegum forsendum lesskilnings. Lestur er flókin færni sem krefst kennslu og þjálfunar með nákvæmum leiðréttingum og stuðningi frá upphafi formlegs lestrarnáms. Hérlendis er hefð fyrir því að lestrarþjálfun fari fram heima í formi heimalesturs þar sem kvittað er fyrir hlustun, en framkvæmdin hefur lítið verið rannsökuð. Tilgangur þessarar rannsóknar var að varpa ljósi á fyrirkomulag og framkvæmd heimalesturs út frá sjónarhóli kennara. Spurningalisti var sendur til kennara í 1. bekk á landsvísu haustið 2024 (svarhlutfall = 92%). Niðurstöður bentu til að algengast væri að kennarar settu fyrir heimalestur 15 mínútur í senn, fimm sinnum í viku og að kvitta ætti fyrir hlustun. Meirihluti kennara kvaðst gera sömu kröfur til allra nemenda um umfang heimalesturs en helst var vikið frá almennum kröfum vegna tungumálakunnáttu nemenda. Afar sjaldgæft var að vikið væri frá heimalestri. Takmörkuð íslenskuþekking nemenda var metin hvorki sem lítil né mikil hindrun í heimalestri. Hins vegar var skortur á íslenskuþekkingu foreldra metin sem helsta hindrunin fyrir framkvæmd heimalesturs af þeim hindrunum sem metnar voru, meiri hindrun en bágar heimilisaðstæður eða hegðunarvandi. Niðurstöður rannsóknarinnar gefa tilefni til endurskoðunar á núverandi framkvæmd heimalesturs í þeim tilgangi að finna tækifæri til framfara svo allir nemendur njóti árangurs af nákvæmri og endurtekinni lesfimiþjálfun.| Tímabil | 3 okt. 2025 |
|---|---|
| Viðburðartitill | Menntakvika 2025: Ráðstefna í menntavísindum |
| Tegund atburðar | Ráðstefna |
| Staðsetning | Reykjavík, ÍslandSýna á korti |
| Viðurkenning | Alþjóðlegt |