Lýsing
Kennsluhættir geta haft mikil áhrif á lestrarnám barna, sérstaklega þeirra sem standa höllum fæti. Í erindinu verður fjallað um gagnreyndar kennsluaðferðir í lestrarkennslu og gildi þeirra í að styðja við nám barna í áhættu, skapa jafnari tækifæri og draga úr ójöfnuði. Sjónum verður einkum beint að félagakennslu sem rannsóknir hafa sýnt að geti skilað fjölþættum ávinningi fyrir nám nemenda.Kynnt verða gögn úr samanburðarrannsókn, Samvinna um læsi fyrir alla, þar sem metin voru áhrif mismunandi kennsluaðferða á lestrarnám barna í 1. og 2.bekk. Átta skólum á höfuðborgarsvæði var skipt af slembivali í þátttökuskóla, þar sem PALS-félagakennsla var meðal lestrarkennsluaðferða, og samanburðarskóla með annars konar lestrarkennslu. Kennarar í þátttökuskólum fengu hálfsdags námskeið og hófu beitingu K-PALS á haustönn og Grunn-PALS á vorönn 1.bekkjar. Metin var námsframvinda í hljóðaþekkingu, umskráningu, lesfimi og lesskilningi, sérstaklega hjá börnum með íslensku sem annað tungumál (ÍSAT) og þeirra sem höfðu minnstu stafaþekkinguna í upphafi 1.bekkjar, sem hætt er við lestrarerfiðleikum.Niðurstöður sýndu meðal annars vaxandi mun milli barna í áhættu og jafnaldra þeirra. Þannig drógust börn með ÍSAT og/eða litla upphafsþekkingu sífellt meira aftur úr jafnöldrum sínum með tímanum. Þessi svo kölluðu Mattheusar-áhrif reyndust mun meiri í samanburðarskólum en í skólum þar sem PALS-félagakennsla var meðal kennsluaðferða. Börn í áhættu tóku mun meiri framförum í hljóðafimi, orðafimi, umskráningarfimi og lesfimi þegar PALS-félagakennsla var hluti af lestrarkennslunni. Niðurstöður benda til að PALS-félagakennsla sé skilvirk aðferð til að styðja við lestrarnám barna í áhættu og geti spornað við vaxandi ójöfnuði í (lestrar)námi meðal barna á Íslandi| Tímabil | 3 okt. 2025 |
|---|---|
| Viðburðartitill | Menntakvika 2025: Ráðstefna í menntavísindum |
| Tegund atburðar | Ráðstefna |
| Staðsetning | Reykjavík, ÍslandSýna á korti |
| Viðurkenning | Innlent |