Lýsing
Staða nemenda í lestri í íslenskum grunnskólum hefur verið vaxandi áhyggjuefni sem og hnignandi árangur þeirra í alþjóðlegu mati á lesskilningi síðastliðinn áratug. Ný lög um farsæld barna kveða á um notkun þrepaskipts stuðning til að bæta árangur nemenda en ekki er lýst hvernig skuli útfæra slíkan stuðning. PALS-félagakennsla (e. Peer-Assisted Learning Strategies) felur í sér gagnreyndar aðferðir sem byggja á félagastuðningi og markvissum kennsluháttum. Grunn-PALS (e. 1st Grade-PALS) er lestrarkennsluefni sem ætlað er að nota á yngsta stigi grunnskóla þar sem meðal annars er unnið með undirstöðuþætti lesturs. Markmið þessarar frumrannsóknar (e. pilot study) var að meta fýsileika notkunar PALS-félagakennslu við þrepaskipta lestrarkennslu í einum grunnskóla á höfuðborgarsvæðinu með hátt hlutfall fjöltyngdra nemenda. Þátttakendur voru nemendur í 2. bekk (n = 47) skólaárið 2024-2025. Aðferðir Grunn-PALS voru notaðar bæði í bekkjarkennslu á þrepi 1 og við markvissa kennslu á þrepi 2 fyrir þá nemendur sem þurftu viðbótar stuðning. Lestrarfærni nemenda var metin 12 sinnum yfir skólaárið með fjölbreyttu lestrarmati og borin saman við fyrirliggjandi samanburðargögn úr rannsókninni Samvinna um læsi, sem safnað var skólaárið 2022-2023. Frumniðurstöður bentu til jákvæðra áhrifa á lestrarfærni nemenda í samanburði við samanburðarhópinn. Niðurstöðurnar vörpuðu einnig ljósi á kosti og hindranir við innleiðingu Grunn-PALS við þrepaskipta lestrarkennslu fjölbreytts nemendahóps sem rætt verður um í kynningunni| Tímabil | 3 okt. 2025 |
|---|---|
| Viðburðartitill | Menntakvika 2025: Ráðstefna í menntavísindum |
| Tegund atburðar | Ráðstefna |
| Staðsetning | Reykjavík, ÍslandSýna á korti |
| Viðurkenning | Innlent |
Lykilorð
- Lestrarkennsla
- PALS-félagakennsla