Mótsagnir og merkingarsköpun: Raddir reyndra leiðtoga af sveitarstjórnarstiginu í miðju innleiðingarferli farsældarlaga

Lýsing

Erindi á Menntakviku - ráðstefnu í menntavísindum.

Ágrip:
Áherslu á þverfaglegt samstarf um menntun og farsæld barna hefur vaxið ásmegin á alþjóðavísu. Með tilkomu laga um samþættingu þjónustu í þágu farsældar barna árið 2021 stigu íslensk stjórnvöld þýðingarmikið skref, en lögin kveða á um samstarf milli kerfa og stofnana sem og þverfaglegt samstarf ólíkra fagstétta í þágu barna. Um allt land hafa sveitarfélög hafist handa við að endurskoða skipulag og þróa starfshætti í takt við áherslur laganna. Í þessu erindi er fjallað um niðurstöður fyrsta hluta rannsóknar um innleiðingu og útfærslu farsældarlaganna í þremur sveitarfélögum. Tilgangur fyrsta hluta er að greina raddir leiðtoga í menntunar-, frístunda- og velferðarhluta sveitarfélaga, sem hafa staðið í stafni innleiðingarferlisins. Tekin voru viðtöl við 12 reynda stjórnendur í stjórnsýslu sveitarfélaganna og þau greind með kenningar um merkingarsköpun (e. sense-making) til hliðsjónar. Fyrstu niðurstöður leiða í ljós að leiðtogarnir skapa merkingu á lögunum sjálfum með fjölbreyttum hætti, t.d. í gegnum félagsleg ferli, afturblik og með því að endurmeta, aðlaga og toga til rammana um menntun og velferð barna í sínu nærsamfélagi. Leiðtogarnir deila sýn á mikilvægi laganna og grípa til myndlíkinga og sagna til að skapa merkingarbærar tengingar við farsæld barna. Margvíslegar mótsagnir verða á vegi þeirra í ferlinu, sem tengjast bæði útfærslu nýrra starfshátta en einnig áskorunum sem tengjast því að leiða saman fagfólk í fjölmennum stofnunum og skapa sameiginlega sýn í anda laganna. Niðurstöður rannsóknarinnar munu nýtast sveitarfélögum, stjórnvöldum og fagfólki til að styðja við útfærslu og framkvæmd farsældarlaganna.

Tímabil	3 okt. 2025
Viðburðartitill	Menntakvika 2025: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent