Reglur, sveigjanleiki og siðferði: Gervigreind í íslenskum og norrænum háskólum

Lýsing

Gervigreind er að umbreyta háskólastarfi á Norðurlöndum sem kallar eftir nýjum siðferðilegum og stefnumótandi viðbrögðum. Í þessari rannsókn er greint hvernig háskólar í Danmörku, Finnlandi, Íslandi, Noregi og Svíþjóð hafa mótað stefnu, ramma og leiðbeiningar um notkun gervigreindar í námi og kennslu. Sérstök áhersla er lögð á stöðuna á Íslandi og hvernig íslenskir háskólar nálgast þetta viðfangsefni.

Íslenska háskólastigið einkennist af sveigjanlegri og minna íþyngjandi leiðbeiningum en víða annars staðar á Norðurlöndum. Leiðbeiningar íslenskra háskóla leggja áherslu á skapandi möguleika gervigreindar og virka þátttöku kennara og nemenda í mótun ábyrgrar notkunar. Það er í takt við opnari nálgun íslenskra stjórnvalda á sviði nýsköpunar og menntunartækni. Í samanburði við önnur Norðurlönd kom í ljós að finnskar og sænskar stofnanir hafa þróað ítarlegri og agaðri ramma, sérstaklega þegar kemur að siðferðilegum meginreglum, gagnavernd og gagnsæi. Í Noregi og Danmörku er meiri áhersla lögð á tæknilega innviði.

Rannsóknin dregur fram sameiginleg stefnumið á borð við ábyrgð kennara, gagnsæi í hvernig nemendur nota gervigreind og mikilvægi siðferðilegrar notkunar gervigreindar. Jafnframt koma fram skörp skil milli þjóða þegar kemur að framkvæmd, þjálfun og skýrleika í reglum. Niðurstöðurnar gefa innsýn í hvar tækifæri liggja til aukinnar samvinnu og frekari mótunar á leiðbeiningum um ábyrga notkun gervigreindar í háskólastarfi.

Tímabil	3 okt. 2025
Viðburðartitill	Menntakvika 2025: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent