Lýsing
Sykursýki af tegund 2 (ST2) er langvinnur efnaskiptasjúkdómur með fylgikvilla sem geta skert heilsu og lífsgæði. Þar á meðal, en síður nefndir í tengslum við ST2, eru skertur vöðvastyrkur, jafnvægistruflanir, skertur hreyfanleiki liðamóta og breytingar á göngumynstri. Þessar takmarkanir geta verið hamlandi og þar að leiðandi dregið úr þátttöku í hreyfingu, sem er mikilvægur hluti meðferðar við ST2. Markmið: Tilgangur rannsóknarinnar var að bera saman styrk, jafnvægi, hreyfivídd um ökkla, gönguhraða og göngumynstur fólks með og án ST2 á Íslandi, auk þess að kanna samband líkamlegrar afkastagetu og lífaflfræði göngu meðal einstaklinga með ST2. Aðferðir: Rannsóknin var þversniðsrannsókn, þátttakendur voru 38 einstaklingar með ST2 (aldur: 62,03 ± 10,28 ár) og 40 án ST2 (aldur: 62,13 ± 9,44 ár). Eftirfarandi mælingar voru framkvæmdar: sjálfvalinn gönguhraði, hámarksgönguhraði, skreflengd, jafnvægi, setjast-og-standa próf (sit-to-stand test; STS), styrkur kálfavöðva og vöðva framan á læri, gripstyrkur og hreyfivídd um ökkla. Tölfræðileg úrvinnsla var unnin í Jamovi. Niðurstöður: Þátttakendur með ST2 gengu hægar, voru lengur að standa upp í STS, með lakara jafnvægi, minni styrk og verri hreyfivídd í ökklakreppu. Aukinn gönguhraði hafði tengsl við lengri skref, aukinn styrk í kálfavöðvum, betra jafnvægi og aukna hreyfivídd um ökkla í spyrnufasa. Ályktun: Niðurstöður styðja fyrri rannsóknir sem benda til skerðinga á líkamlegri færni einstaklinga með ST2. Þær varpa ljósi á veikleika sem mikilvægt er að greina og bregðast við á viðeigandi máta. Með sérhæfðri þjálfun eru tækifæri til að bæta styrk, jafnvægi og hreyfigetu, stuðla að aukinni þátttöku í hreyfingu og styðja við meðferð fólks með ST2 á Íslandi.| Tímabil | 2025 |
|---|---|
| Viðburðartitill | Menntakvika 2025: Ráðstefna í menntavísindum |
| Tegund atburðar | Ráðstefna |
| Staðsetning | Reykjavík, ÍslandSýna á korti |
| Viðurkenning | Innlent |
Lykilorð
- sykursýki
- Menntakvika
- lífaflfræði