Kennsla á tímum gervigreindar: Sjónarmið háskólakennara og stofnanalegar afleiðingar.

Lýsing

Eftir því sem gervigreind verður í auknum mæli samþætt háskólastarfi er mikilvægt að skilja viðhorf kennara og stuðningsþarfir þeirra til að móta upplýsta stefnu innan háskóla. Þessi rannsókn, sem er sett í samhengi við rannsóknir á kennslufræðilegum breytingum, kannaði reynslu og viðhorf háskólakennara til gervigreindar í kennslu við íslenskan háskóla. Könnun var send til 2.003 kennara, þar á meðal stundakennara og innihélt 79 atriði á sex punkta Likert-kvarða auk opinna spurninga. Svarhlutfall var 17% og 33% meðal akademískra starfsmanna í föstum stöðum.

Niðurstöður benda til þess að flestir svarendur hafi jákvætt viðhorf til gervigreindar og telji hana geta nýst í akademísku samhengi. Kennarar sögðust helst nota spunagreind til að fá hugmyndir að verkefnum og til aðstoðar við skipulag námskeiða en síður til að hanna heil námskeið, búa til námsefni, semja próf eða gefa einkunnir. Sumir notuðu einnig gervigreind við gerð matskvarða, forritun, gagnagreiningu, samantektir og þýðingar.

Siðferðileg álitamál voru áberandi, þar á meðal misnotkun nemenda, óábyrg notkun og áhætta tengd persónuvernd og gagnaöryggi. Svarendur nefndu einnig áhyggjur af hlutdrægni, ónákvæmni og áreiðanleika efnis sem gervigreind býr til, auk takmarkaðrar eigin þekkingar á gervigreindartólum. Kennarar þekktu best til ChatGPT og Microsoft Copilot.

Meira en helmingur svarenda lýsti áhuga á starfsþróun, svo sem vinnustofum um samþættingu gervigreindar í kennslu og hvernig leiðbeina megi nemendum um ábyrga notkun. Meðal þess stuðnings sem mælt var með voru skýrar leiðbeiningar innan háskólans, frír aðgangur að hugbúnaði, kennslufræðileg stuðningsefni, umræðuvettvangar á netinu og afmarkaður tími til kennsluþróunar. Niðurstöðurnar undirstrika mikilvægi þess að háskólar bregðist við áhyggjum kennara og veiti skýra leiðsögn, úrræði og fræðslu til að styðja við árangursríka og siðferðilega samþættingu gervigreindar í kennsluhætti á háskólastigi.

Tímabil	26 jún. 2026
Viðburðartitill	ICED26 Conference Agency and Academic Development Salamanca
Tegund atburðar	Ráðstefna
Staðsetning	Salamanca, SpánnSýna á korti
Viðurkenning	Alþjóðlegt