Nýting gervigreindar í fjarkennslu: Tækifæri, áskoranir og nýsköpun í háskólanámi

Lýsing

Hröð framþróun gervigreindar er að umbylta landslagi háskólamenntunar. Í þessum fyrirlestri er rætt um hvernig kennarar geta notað gervigreindina til að efla samskipti, samvinnu og styðja við sjálfstjórnun nemenda í fjarnámi.

Vitnað er í niðurstöður rannsókna, m.a. tvær spurningakannanir sem nemendur (n=21 og n=27) svöruðu, í námskeiðinu UPP110f Internetið og upplýsingaleitir, í Upplýsingafræði á Félagsvísindasviði Háskóla Íslands. Sýnd dæmi um hvernig gervigreindin er notuð í kennslu og námi. Fjallað um fjölþætt hlutverk gervigreindar/spunagreindar, hugbúnað og aðferðir til að auka námsupplifun nemenda og skoðaðar fjölbreyttar leiðir til að nýta gervigreind til að skapa kraftmikið, persónulegt og skilvirkt netnámsumhverfi.

Niðurstöðurnar gefa til kynna að nemendur eru sammála til mjög sammála því að það eigi að nota gervigreind í námi (n=20, 95%). Þeir tala um hversu mikinn stuðning og samstöðu þeir upplifðu í hópavinnu þar sem gervigreind var notuð. Þá virðast nemendur vera meðvitaðir um þær áskoranir og siðferðislegu álitamál, sem nemendur í fjarnámi standa frammi fyrir, þegar kemur að notkun gervigreindar í námi.

Þátttakendur á málstofunni munu öðlast dýpri skilning á því hvernig gervigreind getur stutt kennara við hönnun fjarnáms sem nemendur eru sammála um að ýti undir áhuga, samskipti og sjálfstjórnun náms.

Tímabil	26 sep. 2024
Viðburðartitill	Menntakvika 2024: Ráðstefna í menntavísindum
Tegund atburðar	Ráðstefna
Staðsetning	Reykjavík, ÍslandSýna á korti
Viðurkenning	Innlent