Lýsing
Í þessum fyrirlestri er fjallað um hvernig gervigreind er notuð til að bæta og hraða ferli við kerfisbundna fræðilega samantekt um notkun spunagreindar í rannsóknum. Leitað er að heimildum í hefðbundnum fræðilegum gagnagrunnum ásamt gervigreindartólum. Sérstök áhersla er lögð á að skoða hvernig gervigreindartól geta einfaldað rannsóknarferlið með því að flýta fyrir gagnaöflun og auðvelda úrvinnslu heimilda.Í rannsókninni eru notaðar hefðbundnar leitarvélar á borð við Web of Science, Scopus, ProQuest, EBSCO, PubMed, DOAJ, CiteSeerx, Emerald Insight, ScienceDirect og Springer Link. Að auki eru gervigreindartól eins og ChatGPT 4o, Copilot, Scopus AI, Consensus, Elicit og fleiri notuð til að finna viðeigandi heimildir. Ferlið er skráð í dagbók og heimildaskráningarforritin EndNote og Mendeley notuð til að halda utan um heimildir. Gervigreindartólið Rayyan er notað til að fjarlægja tvítekningar og óviðeigandi greinar.
Niðurstöður sýna að gervigreindartól geta stórbætt rannsóknarferlið með því að einfalda leit og úrvinnslu, samantekt og draga saman aðferðir í rannsóknargreinum. Þægilegt er að geta notað rannsóknarspurningar beint í stað þess að nota flókna leitarstrengi.
Skoða þarf frekari möguleika á notkun gervigreindartóla, ræða kosti og galla slíkra verkfæra. Hvernig hægt er að nýta þau til að auka hraða og bæta gæði við vinnslu á fræðilegum samantektum.
| Tímabil | 1 nóv. 2024 |
|---|---|
| Viðburðartitill | Þjóðarspegillinn 2024 - Rannsóknir í félagsvísindum |
| Tegund atburðar | Ráðstefna |
| Staðsetning | Reykjavík, ÍslandSýna á korti |
| Viðurkenning | Innlent |