Teacher efficacy and country clusters: Some findings from the TALIS 2008 survey

TALIS 2008 er alþjóðleg samanburðarrannsókn sem gerð var á vegum OECD í 23
löndum og fjallar um viðhorf og starfshætti kennara á unglingastigi, hugmyndir
þeirra um eigin getu, viðhorf til náms og kennslu, starfshætti og kennsluaðferðir.
Markmið greinarinnar er að kanna svör við völdum spurningum úr TALIS-könnuninni frá 2008 og túlka þær í ljósi fræða og rannsóknarniðurstaðna um trú kennara
á sameiginlega getu samstarfshópsins. Valin voru samtals 53 atriði úr 11 spurningaflokkum könnunarinnar sem tengdust markmiðinu að kanna starfshætti og
trú kennara á eigin getu í alþjóðlegu samhengi. Með fjölvíddakvörðun (e. multidimensional scaling) voru greindar 3 víddir í gögnunum og nokkrir landahópar
sem einnig voru greindir með klasagreiningu (e. cluster analysis). Mikilvæg
niðurstaða er sú að mismunur milli landa endurspeglar að miklu leyti landfræðilega stöðu þeirra, sem bendir til þess að kennsluhættir sem metnir eru í TALIS
eigi sér dýpri menningarlegar rætur í ólíkum landsvæðum. Meginvíddin, vídd 1,
sem kalla mætti „hefð fyrir áhorfi, endurgjöf og umbótum“, greinir á milli landa
þar sem annars vegar er fylgst beint með kennslu og komið með tillögur að
endurbótum sem leiða til bættra starfshátta, og hins vegar landa sem gera þetta í
minna mæli. Í ljós kom að þessi vinnubrögð eru meira stunduð í Austur-Evrópu,
Asíu/Ameríku en í Vestur-Evrópu, þar á meðal Norðurlöndunum. Vídd 2 stendur
fyrir áherslu á samvinnu og samkennslu, og vídd 3 sem tengist þörf fyrir starfsþróun á ákveðnum sviðum.